Brazili mposht Britaninë, shkëlqen Neymar

Kombëtarja braziliane e ka mposhtur Britaninë e Madhe në miqësoren përgatitore para Lojërave Olimpike me rezultat 2-0.

Sandro i dha epërsinë Brazilit pas një goli me kokë në pjesën e parë pas 13 minutash lojë, një sfidë të cilën brazilianët edhe e dominuan.

Në minutën e 35-të u akordua penalti për Brazilin pas një dueli të ashpër të Micah Richards me Hulk. Neymar e ekzekutoi goditjen nga pika e bardhë për 2-0 dhe rezultatin përfundimtar.

Brazili kështu hyn në Lojërat Olimpike si një prej favoritëve, teksa Britania do të shpresojë të rigjejë formën dhe të kërkojë medaljen e artë para tifozëve vendas.

(ar.ku/BalkanWeb)