Pas kthimit në Kuvend të dy partive opozitare, LDK dhe AAK, kthimi i të cilave e mundësoi miratimin në parim të ligjit për Ndërmarrjet Publike dhe Projektligjit për Ndërtim, ka reaguar Lëvizja Vetëvendosje, e cila dje e kishte lëshuar seancën, duke i qëndruar kështu besnike marrëveshjes që e kishin arritur kjo së bashku me LDK-në dhe AAK-në. Zyrtarë të Vetëvendosjes kanë thënë sot se gjatë takimit të djeshëm në mes grupeve parlamentare, kryetarit të Kuvendit, Jakup Krasniqi, në të cilin ishte i pranishëm edhe zëvendësambasadori amerikan, Michael Murphy, kishte presion nga ky i fundit që opozita të qëndrojë në seancë për ti miratuar ligjet në fjalë. Zyrtarë të LDK-së dhe të AAK-së kanë thënë se nuk kanë pasur kurrfarë presioni nga askush që të qëndrojnë në seancën e djeshme të Kuvendit.
Shefi i Grupit Parlamentar nga Lëvizja Vetëvendosje, Visar Ymeri, ka thënë sot se në takimin e djeshëm në mes grupeve parlamentare dhe kreut të Kuvendit, Jakup Krasniqit, ishte i pranishëm edhe zëvendës ambasadori i ShBA-së, Michael Murphy. Ai tha se ky i fundit ka bërë presion të vazhdueshëm ndaj partive politike që të qëndrojnë në seancë. Ymeri shtoi se zëvendësambasadori Merphy ka ardhur në takim dhe i ka thënë ato që ka menduar ti thotë dhe ka dalë nga takimi duke mos shprehur interesim ti dëgjojë mendimet e palëve të tjera.
Dje në takimin që e kemi pasur të gjithë kryetarët e grupeve parlamentare, por edhe nënkryetarët edhe kryetari i Kuvendit me zëvendës ambasadorin të Shteteve të Bashkuara të Amerikës është vështirë ta cilësojmë së pari si takim, meqenëse zëvendësambasadori vetëm ka ardhur në atë takim, i ka shprehur ato që ka dashur të thotë dhe e ka lëshuar takimin. Pra nuk ka qenë fare i interesuar ti dëgjojë argumentimet tona dhe në këtë që e ka shprehur ka kërkuar dhe ka insistuar që ligji për ndërtimin dhe ligji për ndërmarrjet publike të futet në seancën e djeshme domosdoshmërish dhe të votohet në seancën e djeshme domosdoshmërish. Asnjë arsyetim për këtë gjë pse është kaq i rëndësishëm të votohet ai nuk është dhënë dhe në këtë drejtim konsideroj që trysnia ndryshe nuk duket pos kështu, ka thënë ai.
Mirëpo, i pyetur nga Kosovapress se a ndihen të tradhtuar nga dy partitë e tjera opozitare, të cilat vendosen të qëndrojnë në seancë për miratimin e këtij projektligji, kur dihet se edhe kanë pasur një marrëveshje, ai tha se kjo është çështje dhe përcaktim i deputetëve, dhe ka shtuar se qëndrimi i tyre në seancën e djeshme është edhe braktisje e interesit të qytetarëve të Kosovës.
Unë nuk mendoj se këtu mund të flitet se a është tradhtuar lëvizja Vetëvendosje a jo, unë mendoj se poqë se deputetët mendojnë se janë të dëmshme dhe janë votuar ato, atëherë këtu, në njëfarë mënyrë është braktisur qytetari dhe interesi i qytetarëve të Kosovës, ka thënë ai.
Ai ka thënë se formën e bojkotit do ta përdorim edhe në të ardhmen sa herë që e shohin se Kuvendi po instrumentalizohet dhe po shndërrohet në një forum ku do të votohet për trysnitë nga jashtë.
Ndërsa, Arben Gashi nga LDK-ja, ka qenë më i relaksuar për ta komentuar këtë takim, pasi që nuk ka qenë i pranishëm në të, por ka qenë Ismet Beqiri, shef i Grupit Parlamentar i kësaj partie. Ai ka thënë se nuk është në dijeni të një presioni të tillë.
Unë nuk kam pas asnjë lloj takimi me ndërkombëtarët, asnjë lloj influence, presioni dhe asgjë. Unë e di që kryetari së bashku me shefat e grupeve parlamentare ka pas takim dhe ka gjetur zgjidhjen. Se a ka pas ndërkombëtarë në atë takim apo jo, nuk e di se nuk kam qenë, ka theksuar Gashi.
Mirëpo, shefi i Grupit Parlamentar i AAK-së, Ardian Gjini, fjalën presion e ka marrë më shumë si metaforike. Ai e ka pranuar se zëvendësambasadori amerikan ka kërkuar që partitë të gjejnë një gjuhë të përbashkët që të shkojnë në tutje në këtë proces.
Unë mund të ju them kështu, presioni është më shumë fjalë metaforike, ka pas kërkesë eksplicite të zëvendës ambasadorit Murphy që ne të gjejmë një gjuhë të përbashkët dhe të shkojmë më tutje, ka deklaruar ai.
Ndryshe, edhe pse partitë opozitare kishin paralajmëruar se do ti bojkotonin seancat e Kuvendit të Kosovës nëse nuk hiqen nga rendi i ditës ligji për institucionet mikro-financiare, ligji për Ndërmarrjet Publike dhe Projektligji për Ndërtimin, kjo nuk ndodhi, pasi që LDK-ja dhe AAK-ja i janë kthyer seancës së Kuvendit, pasi ishte arritur marrëveshja në takimin e dytë mes kryetarit të kuvendit, Jakup Krasniqi, nënkryetarëve dhe shefave të grupeve parlamentare, ku prezent ishte edhe zëvendës ambasadori amerikan në Kosovë, Michael Murphy. Seanca ka vazhduar me heqjen nga rendi i ditës të Projektligjit për Bankat dhe Institucionet Mikrofinanciare deri në arritjen e një marrëveshjeje mes grupeve parlamentare, ndërsa në rend të ditës është futur shqyrtimi i dy projektligjeve në lexim të parë, ai për Ndërmarrjet Publike dhe për Ndërtimet. (Kosovapress)
Shpërndaje:
PRISHTINË- Kryetari i Kuvendit të Kosovës, Jakup Krasniqi e ka cilësuar të ngutshme, dorëheqjen e zëvendëskryeministrit dhe ministrit të Drejtësisë, Hajredin Kuçi, pas vendimit të Kuvendit për mos heqjen e neneve 37 dhe 38 nga Kodi Penal, nene këto që kanë të bëjnë me mediat dhe gazetarët dhe përgjegjësitë e tyre penale.
PRISHTINË- Ish-Presidenti Fatmir Sejdiu dhe ish-ushtruesi i detyrës në këtë post, Jakup Krasniqi aktualisht kryetar i Kuvendit të Kosovës, pas tre muajsh mund të përballen me drejtësinë shkruan sot gazeta kosovare Express. Dyshimet për falje të viteve të burgut, ndaj personave të dënuarve për vrasje e dhunë, ka mundësi t’i ballafaqojë me ligjin.
PRISHTINË- Kuvendi i Kosovës pritet të mbaje sot ne orën 14:00 një seancë të jashtëzakonshme për të debatuar lidhur me gjendjen në veri të Kosovës.
PRISHTINE - Presidentja e Kosovës, Atifete Jahjaga ka uruar kreun e Ipeshkvisë së Kosovës, Imzot Dodë Gjergjin dhe të gjithë besimtarët katolikë, me rastin e Festës së Pashkëve. 
