TIRANE-Një aksident me pasojë 2 të plagosur ka ndodhur sot pasdite në Tiranë.
Mesohet se një automjet dhe një motorr janë përplasur me njëri-tjetrin pranë shkollës ‘Vasil Shanto’. Si pasojë janë aksidentuar 2 personat që ndodheshin në motorr.
Të dy personat, nje burre dhe nje grua janë dërguar me urgjencë në Spitalin Ushtarak, nga ku mësohet se njëri prej tyre ndodhet në gjendje të rëndë për jetën.

Ndërkohë po sot pasdite është shënuar një tjetër aksident në autostradën Tiranë-Durrës.
Mësohet se shtetasi Ferti Qose 70 vjec, është plagosur nga një makinë teksa përpiqej të kalonte trafik ndarësen. I moshuari është dërguar me urgjencë në spital por gjendja e tij mbetet kritike

(d.b/BalkanWeb)

TIRANE-Kristiano Ronaldo është padyshim dështimi më i madh i kampionatit europian deri më tani. Futbollisti më i fortë i Evropës, autor i 60 golave këtë sezon me Realin e Madridit dhe kapiten i Portugalisë në Europian, ka dështuar në udhëheqjen e kombëtares së tij.

Pas paraqitjes së shëmtuar kundër Danimarkës, mediat portugeze e kanë masakruar në komentet e tyre, duke e vënë në qendër të akuzave për një rendiment fals. “Dështimet e Ronaldos”, shkruan e përditshmja sportive në “Rekord”. “Është futbollisti më i mirë në botë, por jo në Portugali”, komenton “Diario de Noticias”. Portugalia fitoi 3-2 ndaj Danimarkës, por Ronaldo humbi disa mundësi të mira, që në fund mund t’i kishin kushtuar shumë skuadrës së Paulo Bentos. Për mediat, duket se sulmuesi i Realit është kthyer në një problem për ekipin luzitan. Vetë Ronaldo i ka hedhur poshtë këto kritika, duke deklaruar se nuk i interesojnë aq shumë golat personalë. “Golat do të vijnë, por nëse më duhet të ndërroj golat e mi me fitoret e skuadra, do të firmosja menjëherë”, tha ai. Gjatë ndeshjes, tifozët nuk i kanë kursyer një tallje, duke thirrur në kor “Mesi, Mesi”. Gjë që Ronaldo nuk e ka pritur mirë. “Një vit më parë, në këtë periudhë Mesi ishte në shtëpi në Kupën e Amerikës së Jugut”, deklaroi Kristiano Ronaldo.

(d.b/BalkanWeb)

TIRANE-Sfidat Francë-Ukrainë dhe Angli-Suedi ditën e premte do të mbyllin ndeshjet e dyta të fazës në grupe. Në Kiev, britanikët e drejtuar nga Roi Hoxhson do të kërkojnë të thyejnë një tabu ndaj ekipit skandinav, kundër të cilit nuk kanë fituar kurrë në një kompeticion të madh.

Trajneri Hoxhson u shpreh i kënaqur me takimin kundër Francës, por ai kërkoi nga skuadra e tij që ndaj Suedisë të bëjë një lojë më sulmuese. “Jam i lumtur me startin, sepse luajtëm mirë sidomos në mbrojtje, por tani na duhet të përmirësohemi në sulm. Duhet të përpiqemi që të krijojmë sa më shumë raste dhe të finalizojmë”, deklaroi trajneri i Anglisë.

Sipas tij, është e vështirë që skuadrat të krijojnë shumë raste në këto nivele dhe futbollistët duhet të jenë shumë efektivë. Por, edhe këtë herë britanikëve do t’u mungojnë Uejn Runi, teksa në sulm pritet të luajë dyshja Uellbek-Defo. Hoxhson u shpreh gjithashtu se Suedia është një ekip i fortë, por nuk është Franca dhe për këtë arsye, Anglia e tij mund t’i lejojë vetes një futboll më të hapur.

(d.b/BalkanWeb)

TIRANE-Duhet të tregojmë se jemi një ekip i madh. Ka qenë kjo deklarata e trajnerit të Francës Loran Blank përpara ndeshjes ndaj Ukrainës, në grupin D.

Tekniku i “Gjelave” kërkoi nga futbollistët e tij që të tregojnë veten në këtë ndeshje, e cila duket mjaft e rëndësishme për fatet e kësaj skuadre në Europian. Franca tregoi një formë të mirë në ndeshjen ndaj Anglisë, por motivimi i skuadrës dukej në maksimum në atë sfidë, ndërsa këtë herë do të jetë përballë një kundërshtar me më pak emër, por ndeshja ka një rëndësi akoma më të madhe. “Futbollistët e mëdhenj gjithmojnë e tregojnë veten në ndeshjet e madhe, – deklaroi Blank. – Nëse ne kemi futbollistë të mëdhenj, ata duhet të shfaqen, sepse kemi nevojë për një fitore. Në ndeshjen e parë kishim shumë presion, gjë që i bën lojtarët të mos japin gjithçka”, shtoi trajneri i Francës.

Në krahun tjetër, Ukraina beson shumë tek entuziazmi i tifozerisë së saj, por edhe te një Shevçenko i rilindur për këtë takim. Skuadra e Oelg Bllohin e nisi mjaft mirë Europianin, duke fituar 2-1 kundër Suedisë së Ibrahimoviç.

(d.b/BalkanWeb)

TIRANE-Kapiteni i Bajernit të Mynihut dhe i kombëtares së Gjermanisë ka ushqyer spekullimin rreth asaj se ku do të luajnë sezonin e ardhshëm. Filip Lahm ka bërë një kthesë të papritur në lidhje me të ardhmen e tij, vetëm një javë pasi kishte thënë se nuk ishte duke menduar për ta lënë Bajernin e Mynihut.

Pasi ishte lakuar emri i tij për te Los Blancos, vetë mbrojtësi bavarez kishte pohuar se e vetmja mënyrë që Real Madrid dhe trajneri Hozse Mourinjo të mbërrinin tek ai do të ishin bisedimet me klubin e Bajernit. Por Filip Lahm nuk ishte më aq “i turpshëm” kur u pyet nëse mund ta shihnim në veprim në kryeqytetin spanjoll, dicka që mund të jetë e mundur. “Unë nuk dua për të përjashtoj çdo gjë për të ardhmen time, – ka thënë Lahm për “Bild”. – Prandaj ekziston edhe shprehja: kurrë mos thuaj kurrë. Mourinjo është një trajner i lartë, i cili ka gëzuar shumë sukses.” Tekniku portugez është duke kërkuar të forcojë skuadrën e tij fituese të titullit në La Liga për sezonin e ardhshëm, teksa njëri prej emrave që pëlqehet shumë prej tij shtë Lahm, por trajneri i Realit të Madridit mund të ndeshë kundërshtimin e fortë nga bordi drejtues i Bajernit, nëse do të tentojë një ofertë, duke qene se kapiteni bavarez është i kontraktuar me klubin deri në vitin 2016. Lahm është aktualisht me detyrën ndërkombëtare në “Euro 2012”, si kapiten dhe lojtar titullar i Gjermanisë, e cila mundi Holandën në një përplasje vendimtare në Grupin B, mbrëmjen e së mërkurës.

(d.b/PanoramaSport/BalkanWeb)

TIRANE-Nuk mund të kalonte pa shkaktuar polemika deklarata e Antonio Kasanos, i cili u shpreh se nuk dinte që të ekzistonte ndonjë gei në kombëtaren e kaltër, por uronte me gjithë zemër që të mos kishte të tillë.

Vec reagimeve të parashikueshmee të organizatave për mbrojtjen e të drejtave të homoseksualëve, sulmuesi barez merr një thumb të vërtetë nga Alesandroi Ceki Paone. Gazetari dhe prezantuesi televizi Italian deklaroi gjatë një emisioni radiofonik se ai ka patur lidhje intime me një nga anëtarët e kombëtares italiane që është aktualisht në Europian, dhe ai i ka treguar dhe emrin e një tjetër futbollisti gei në gjirin e të kaltërve.

Alesandro Ceki Paone shtoi se me siguri trajneri Prandeli e di se cilët janë homoseksualët në ekipin e tij, ndërsa për sa i përket Kasanos e ftoi publikisht për një darkë në mënyrë që t’i tregojë se nuk ka pse të trembet nga geit që mund të ketë në skuadër.

(d.b/Supersport/BalkanWeb)

TIRANE-Një aksident me pasojë një të plagosur rëndë ka ndodhur sot në orët e pasdites ne tirane ku një makinë dhe një motorr janë përplasur mes tyre. Ngjarja ka ndodhur në rrugë ‘Ferit Xhajko’ ku sipas burime të policisë motori, i cili ishte me shpejtësi të lartë ka përplasur nga mbrapa makinën Tip Ford Fokus me targa AA 459 CP. Pas aksidentit drejtuesi i makinës është shoqëruar për t’u marr në pyetje për rrethanat e aksidentit ndërsa drejtuesi i motorit ndodhet në Spitalin Ushtarak në gjendje kritike për jetën. Sipas policisë së kryeqytetit drejtuesi i motorit lëvizte me shpejtësi të lartë në momentin e aksidentit cka solli dhe plagosjen e rëndë.

(d.b/News24/BalkanWeb)

TIRANE-Kroacia ka fituar lehtësisht ndeshjen e parë në grupin C, duke mposhtur 3-1 Irlandën e Xhovani Trapatonit në Poznan të Polonisë. Një ndeshje e jashtëzakonshme e skuadrës ballkanase, që ka dominuar dhe ka arritur të marrë kreun e grupit, ndërkohë që irlandezët janë shfaqur një ekip pa fantazi dhe me një sistem loje konfuz.
Kroatët ishin favoritë për këtë takim dhe këtë ata e treguan në fushën e lojës, duke realizuar pas vetëm 3 minutash me anë të Manxhukiç. Barazimi i përkohshëm i Irlandës ishte vetëm një iluzion, pasi Kroacia ka marrë shumë shpejt frenat e lojës në dorë. Një provë e vërtetë force për skuadrën e Sllaven Biliç, e cila në ndeshjen e ardhshme do të përballet me Italinë. Irlanda ka luajtur ndryshe nga mënyra e saj e zakonshme, duke u hedhur në aventurë në sulm, gjë që u shfrytëzua mjaft mirë nga kroatët. Pas golit të Manxhukiç në minutën e tretë, Lexher barazoi gjithçka në të 19-tën, duke bërë të shpërthejnë në festë tifozët e shumtë britanikë në stadium. Por, në fundin e pjesës së parë, Nikica Jelaviç shënoi për herë të dytë pas një kthimi të gabuar të topit mbrapa. Irlandezët protestuan për një pozicion jashtë loje, madje Xhovani Trapatoni hyri edhe në fushë, megjithatë topi u pasua në mënyrë të gabuar nga lojtari irlandez Uard.

Në pjesën e dytë, Irlanda kërkoi të rinisej në sulm, por Perisiç nga e majta ishte një rrezik serioz për mbrojtjen britanike. Krosi i tij në minutën e 50-të, gjeti në zonë Manxhukiç, që e përplasi topin në fytyrën e portierit Shei Givën dhe më pas në rrjetë, duke e çuar takimin në 3-1. Në këtë pikë, Trapatoni ka luajtur kartën e dëshpërimit, duke hedhur në fushë Koks dhe Uollters për MekGidin dhe Doil. Irlanda meritonte një penallti pas një ndërhyrjeje të Shildenfeld ndaj Roi Kin, megjithatë gjyqtari Bjorn Kuipers nuk e akordoi, duke gabuar qartazi.

(d.b/AltinLatifi/BalkanWeb)

TIRANE-Ukraina dhe Suedia do të mbyllin raundin e parë të fazës në grupe të Europianit 2012, me ndeshjen që do të zhvillohet sot në mbrëmje në Kiev.

Trajneri i ekipit vendas Oleg Bllohin deklaroi para kësaj sfide se veteranët si Anatoli Timoshuk e Andrij Shevçenko duhet të udhëheqin talentet e rinj. “Ata duhet të jenë një shembull. Futbollistët tanë të rinj shpesh japin më tepër sesa munden në fushë, – tha Bllohin. – Racizmi? Në Ukrainë nuk ka racizëm. Nëse do të ketë incidente të tilla, nuk do të ndodhin në Ukrainë”, shtoi tekniku.

Ndërkohë, homologu i tij Erik Hamren u shpreh se është i qetë para kësaj sfide. “S’kam probleme të fle natën, pasi nuk shoh shumë DVD. Kur fle mendoj se do të fitojmë dhe ngrihem i lumtur në mëngjes”, shtoi ai.

(d.b/BalkanWeb)

TIRANE-Anglia do të ndeshet sot në orën 18 ndaj Francës, në atë që shihet si beteja më e fortë e grupit D të kampionatit europian. Britanikët vijnë në këtë takim pas problemesh të shumta me dëmtimet, por edhe pas polemikave të krijuara për lënien jashtë të Rio Ferdinand. Megjithatë, një lajm që i ka habitur të gjithë ditën e djeshme ka qenë ai se Federata Angleze ka përgatitur kthimin e ekipit kombëtar që më 20 qershor, një ditë pas ndeshjes së fundit në grup ndaj Ukrainës. “Është një procedurë standarte”, kanë thënë zyrtarët e Federatës për “The Sun”. Gjithsesi, procedura të tilla nuk i japin aq shumë besim skuadrës së Hoxhson edhe pse anglezët duket se janë munduar që të mos i lënë asgjë rastësisë përsa i përket udhëtimit të ekipit. “Është një vendim i çuditshëm, nëse do të isha futbollist nuk do të më kishte pëlqyer diçka e tillë”, deklaroi ish-mesfushori i Anglisë Alan Mullery.
Hoxhson
Megjithë prenotimin e kthimit, trajneri i Anglisë Roi Hoxhson është i mendimit se skuadra e tij do të arrijë të ecë larg në Europian. Duke folur në prag të ndeshjes me Francën, ai është shprehur se në një sfidë të tillë, më shumë rëndësi se gjithçka ka rezultati. “Kanë qenë tre javë intensive, në të cilat jam ndjerë pjesë e këtij grupi. Futbollistët ma bënë më të lehtë punën, – u shpreh Roi Hoxhson. – Është e çuditshme që Anglia nuk cilësohet një skuadër e madhe meqë ka nga viti 1966 që nuk fiton asgjë. Ne e nisim këtë turne si një prej 16 skuadrave që mund ta fitojë”, shtoi ai. Hoxhson ka shprehur edhe njëherë besimin te 23 futbollistët që ka thirrur si edhe faktin se për momentin Anglia nuk ka asnjë dëmtim. “Që të mos bëjmë një Europian anonim, duhet të luajmë siç dimë të bëjmë, pasi kemi një skuadër të mbushur me futbollistë yje në klubet e tyre. I kam parë çdo javë në kampionat dhe shpresoj që të rikonfirmohen edhe ndaj Francës”, tha më tej Roi Hoxhson.
Franca
Në lidhje me Francën, Roi Hoxhson foli me respekt të madh, duke e konsideruar atë një prej ekipeve më të forta të kontinentit. “Kemi shumë respekt për anglezët, por e di që futbollistët e mi besojnë shumë tek aftësitë e tyre, kështu që të shohim si do të shkojë, – tha trajneri i kombëtares angleze. – Do të jetë një ndeshje impenjative, ndaj një skuadre që gëzon një formë mjaft të mirë dhe që nuk humbet prej 21 ndeshjesh. Por, në Europian shpesh nuk ka rëndësi forma, por mënyra si e luan një ndeshje”, shtoi Hoxhson. Shumë optimist edhe kapiteni Xherard: “Shpirti i grupit është fantastik dhe mezi presim të nisim aventurën tonë. Jemi gati të nde-shemi me Francën. Vapa? Nuk ka rëndësi, sepse do të jetë njësoj për të dyja skuadrat”, shtoi ai.

(d.b/GazetaShqiptare/BalkanWeb)